Rom 13 | MMX | STEP | Limixin axap dinak lok maxopok at lubung amgomgo at lagavaman atnedik, atla kopmen taasen silok goxo vot gamasa, Moroa xa ga lok li nedi. La lagavaman atdik, ne Moroa ga lok li di.

aPas 20:13-15,17

bMas 19:18

Romans 13

Loklok Maxopok At Lubung Amgomgo

1 Limixin axap dinak lok maxopok at lubung amgomgo at lagavaman atnedik, atla kopmen taasen silok goxo vot gamasa, Moroa xa ga lok li nedi. La lagavaman atdik, ne Moroa ga lok li di. 2 Kuren la, nege do kopmen na ronga res at lubung amgomgo, i lok ngan do neni i lox abulubun ne Moroa, la laradi do i lox i na, neni naba ru at lavapaase nop mo loklok teren. 3 Limixin di lok luvukat, di noxo marat at luvuttadi amgomgo, ketla nedi di lok laxakapmek dinaba marat atdi. Kereva, mi vara i do mi noxo marat at luvuttadi di ruuna levenasen silok? Do mi vara i xuren, minak lok luvukat kusu dinaba emi asu minimi, 4 atla nedi luvuttadi gugu at ne Moroa la di gugu ri luvukat atnimi. Ketla do mina lok laxapmek, mina marat atdi, atla nedi di ruuna lolos ti lok li nimi at loxokoxo. Nedi lavasaxaruki at ne Moroa la dik lok na lugugu at ne Moroa xeneng atnedi dik lok laxapmek. 5 Kuren la i epovo rinotno do minang tonga res at luvuttadi di ruuna levenasen silok, kopmen dola mina doma xusuk mun lumukmusak at ne Moroa, ketla mumu bok lodoxoma avukat atnimi i tong box i do minang tonga res.

6 Ni lavasuun bok at na la nemi mi kepe vempilas atla nedi na luvuttadi amgomgo di gugu ri ne Moroa at loxonaleng di lox epovo lugugu atnedi xeneng atnedik. 7 Mina raba di mi levempanga di ngising tin. Do nedi dina sing pilas, mina kepe pilas; dola ri loklok ngangao, mina lox asu bok loklok ngangao atnimi rinedi.

Labalamu La Lenavolo

8 Nemen gat miguta sing kaka tavanga at tara vetpes, kusu miba vorang bok ba i rin, ketla mina lolos kusu mina raba labalamu ri leventaba vetpes. Nege do i balamu leventaba vetpes, na i lox asuusu i do neni ing tonga res at Lenavolo. 9 Lasangaun lenavolo i lok keretna,

“Nemen gat uguta longka; nemen ugutap sev amet tadi; nemen gat utam nem panga; nemen gat lodoxoma ram na xipgas levempanga at tara vetpes;” ^a

la leventaba levempanga bok ik lok keneng at Lenavolo. La lavasuun atnedi axap na levenngas linga i lok keretna,

“Una balamu leventaba vetpes ngan u balamu axa u.” ^b

10 Nege do i balamu lara vetpes, neni xopmen tinotno noxo lok laxakapmek tin. Do mina balamu, i ngan do mi ronga res at lasangaun axap Lenavolo.

11 Mina lox epovo loklok at labalamu, atla nemi miklen loxonatat aleng sala nga i mo. Loxonaleng ira vot pam tinimi ri aus kaxat at lanunga, atla loxonaleng tidik ti roo suu, mo ira auret ta; gano at laaleng nedik diga nuunu kaxat avot teren ga vaxalom. 12 Noxo lox abao la lamain na xap, la laaleng kangking na vot ta. Mina xap ta at loklok laxampanga at lamain, la mina lok kaka levempanga esep ti esep at laaleng kangking. 13 Mina lok kaka luruptuvuk nunuan, na ngan do limixin dik lok keneng at laxasep at laaleng kangking; nemen gat miguta raba gamasa lorooro atnemi ri levempanga ik lok kapmek lorooro, ngan liinin tangtangku laxangkadan lolos, loklok kakapmek maxamang at lixitkis epot, lengkot mamangan, lekarakat, la levereven peves. 14 Ketla mina lok ka levempanga esep at Leeme Silok ne Iesu Karisito, la mina doxoma xepe leveloklok kakapmek ngan lavavara at labantuxu mun.